ಕೋಟಾ ಶಿವರಾಮ ಕಾರಂತರು ಯಾರಿಗೆ ಗೊತ್ತಿಲ್ಲ ಹೇಳಿ. ಮಕ್ಕಳಿಂದ ಹಿಡಿದು ಹಿರಿಯರ ತನಕವೂ ಕಾರಂತರ ಹೆಸರು ಹಸಿರು. “ಕಡಲತೀರದ ಭಾರ್ಗವ”, “ನಡೆದಾಡುವ ವಿಶ್ವಕೋಶ” ಎಂದೇ ಖ್ಯಾತರಾಗಿದ್ದ ಕಾರಂತರು ಕನ್ನಡ ಸಾಹಿತ್ಯ-ಸಂಸ್ಕೃತಿಯ ವಕ್ತಾರ, ಕಾದಂಬರಿಕಾರ, ಕವಿ, ನಾಟಕಕಾರ, ಅನುವಾದಕ, ವೈಜ್ಞಾನಿಕ ಬರಹಗಾರರೂ ಆಗಿದ್ದರು.
ಕಾರಂತರು ಎಲ್ಲಾ ಪ್ರಕಾರಗಳ ಸಾಹಿತ್ಯದಲ್ಲಿ ಪರಿಣಿತಿ ಹೊಂದಿದವರು. ಆಡುಮುಟ್ಟದ ಸೊಪ್ಪಿಲ್ಲ. ಎಂಬ ಗಾದೆಯಂತೆ, ಕಾರಂತರು ಬರೆಯದ ಸಾಹಿತ್ಯ ಪ್ರಕಾರವೇ ಇಲ್ಲ ಎಂದು ಹೇಳಲಾಗುತ್ತದೆ. ಕಾರಂತರು ಯಾವುದೇ ವಿಶ್ವ ವಿದ್ಯಾನಿಲಯಗಳಲ್ಲಿ ಪದವಿ ಅಥವಾ ಸ್ನಾತಕೋತ್ತರ ಪದವಿ ಪಡೆದಿಲ್ಲದಿದ್ದರೂ, ಅವರ ಸಾಹಿತ್ಯ ಪರಿಶ್ರಮ ಮಾತ್ರ ಅಪಾರವಾದುದು ಮತ್ತು ಎಲ್ಲೆ ಮೀರಿದ್ದು. ಇವರ ಅದೆಷ್ಟೋ ಸಾಹಿತ್ಯ ಪ್ರಕಾರಗಳು ವಿಶ್ವ ವಿದ್ಯಾನಿಲಯಗಳಲ್ಲಿ ಪದವಿ, ಸ್ನಾತಕ್ಕೋತ್ತರ ಪದವಿ, ಪಿಎಚ್ಡಿ ಗಳಿಗೆ ಪಠ್ಯವಾಗಿವೆ. ಶಿವರಾಮ ಕಾರಂತರಿಗೆ ಜ್ಞಾನಪೀಠ, ಪದ್ಮಭೂಷಣ, ಪಂಪ ಪ್ರಶಸ್ತಿ, ನಾಡೋಜ ಪುರಸ್ಕಾರ, ಎಂಟು ವಿಶ್ವವಿದ್ಯಾಲಯಗಳು ಗೌರವ ಡಾಕ್ಟರೇಟ್‌ಗಳನ್ನಿತ್ತು ಪುರಸ್ಕರಿಸಿವೆ.
ಪುತ್ತೂರು ಮತ್ತು ಕೋಟ ಶಿವರಾಮ ಕಾರಂತರಿಗೆ ನಿಕಟ ಸಂಬಂಧ ಇರುವುದರಿಂದ ಪುತ್ತೂರು ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ಈ ವೇದಿಕೆಯಲ್ಲಿ ಮಾನ್ಯರ ಬಗ್ಗೆ ಮಾತನಾಡದೇ ಇದ್ದರೆ ಹೇಗೆ? ಅಲ್ವೇ? ಮುಂದೆ ಓದಿ.
ಕಾರಂತರ ಜೀವನದ ಪುಟಗಳು
ಡಾ. ಶಿವರಾಮ ಕಾರಂತರು ಹುಟ್ಟಿದ್ದು 1902 ಅಕ್ಟೋಬರ್ 10ರಂದು ಉಡುಪಿ ಜಿಲ್ಲೆಯ ಕೋಟದಲ್ಲಿ. ಇವರ ತಂದೆ ಶೇಷ ಕಾರಂತರು ,ತಾಯಿ ಲಕ್ಶ್ಮೀ ಕಾರಂತರು. 9 ಮಕ್ಕಳ ಕುಟುಂಬದಲ್ಲಿ ಶಿವರಾಮ ಕಾರಂತರು 4 ನೇಯ ಮಗ. ಶಿವರಾಮ ಕಾರಂತರ ಅಣ್ಣ ಮದರಾಸ ಸರಕಾರದಲ್ಲಿ ಸಚಿವರಾಗಿದ್ದರು. ಇನ್ನೊಬ್ಬ ಅಣ್ಣ ವಾಸುದೇವ ಕಾರಂತರು ಲೇಖಕರೂ ,ಆದ್ಯಾತ್ಮ ವಿಷಯಗಳಲ್ಲಿ ಪ್ರಸಿದ್ಧಿಯನ್ನು ಪಡೆದಿದಾರೆ.ಶೇಷ ಕಾರಂತರು ಶಾಲಾ ಶಿಕ್ಷಕರಾಗಿದ್ದು ದೊಡ್ದ ಕುಟುಂಬವನ್ನು ಸಾಕಲು ಅಸಾಧ್ಯವಾದಾಗ ಕೆಲಸ ಬಿಟ್ಟು ಜವಳಿ ಅಂಗಡಿ ಆರಂಭಿಸಿದರು.ಇಂಗ್ಲೀಷರನ್ನು ಕಂಡರೆ ಅಸಹ್ಯಪಡುತಿದ್ದ ಕಾಲದಲ್ಲಿ ಶೇಷರು ಅವರ ಮಕ್ಕಳನ್ನು ಇಂಗ್ಲೀಷ್ ಶಾಲೆಗೆ ಕಳುಹಿಸಿದರು.
ಕಾರಂತರು 96 ವರ್ಷಗಳ ಸುದೀರ್ಘ ಬಾಳನ್ನು ಕಂಡು ಸುಮಾರು 427 ಪುಸ್ತಕಗಳನ್ನು ರಚಿಸಿ ಸಾಹಿತ್ಯ ಜಗತ್ತಿನ ಕಣ್ಮಣಿಯಾಗಿ ಉಳಿದವರು. ಅವುಗಳಲ್ಲಿ ಒಟ್ಟು 47 ಕಾದಂಬರಿಗಳು ಸೇರಿವೆ. ಕಾರಂತರು ತಮ್ಮ 96 ವಯಸ್ಸಿನಲ್ಲೂ ಹಕ್ಕಿಗಳ ಕುರಿತು ಒಂದು ಪುಸ್ತಕವನ್ನು ಬರೆದಿದ್ದು, ಇದು ವಿಶ್ವ ದಾಖಲೆಗೆ ಅರ್ಹವಾಗಿರುವ ಒಂದು ಸಾಧನೆಯಾಗಿದೆ.
ಶಿವರಾಮ ಕಾರಂತರು ಸಾಹಿತಿಯಾಗಿ ಮಾತ್ರವಲ್ಲದೆ ಇತರ ಕ್ಷೇತ್ರಗಳಲ್ಲೂ ಅಪಾರ ಸಾಧನೆ ಮಾಡಿದವರು. ಮುಖ್ಯವಾಗಿ ಕರ್ನಾಟಕದ ಪ್ರಮುಖ ಕಲೆಯಾದ ಯಕ್ಷಗಾನದ ಉಳಿವಿಗೆ ಪ್ರಯತ್ನಿಸಿ, ಅದರಲ್ಲಿ ಹಲವು ಪ್ರಯೋಗಗಳನ್ನು ಮಾಡಿದವರು. ತಾವೇ ಸ್ವತಃ ನೃತ್ಯವನ್ನು ಕಲಿತು, ಬ್ಯಾಲೆಯಲ್ಲೂ ಗಂಭೀರ ಪ್ರಯೋಗ ಮತ್ತು ಪ್ರಯತ್ನ ಮಾಡಿದವರು. ಅದೆಷ್ಟೋ ಯಕ್ಷಗಾನದ ವಿದ್ಯಾರ್ಥಿಗಳನ್ನು ಸಮಾಜಕ್ಕೆ ನೀಡಿದವರು.
ಕಾರಂತರ ವಿದ್ಯಾಭ್ಯಾಸದ ಪುಟಗಳು
ಕುಂದಾಪುರದ ಶಾಲೆಯಲ್ಲಿ 1920 ರಲ್ಲಿ ಶಿವರಾಮ ಕಾರಂತರು ತಮ್ಮ ಎಸ್.ಎಸ್.ಎಲ್.ಸಿ ಪರೀಕ್ಶೆಯನ್ನು ಬರೆದು ಮುಗಿಸಿದರು. ತಮ್ಮ ಶಾಲೆಯಲ್ಲಿ ರಂಗರಾಯರು ಕಾರಂತರ ಮೊದಲ ಗುರುಗಳಾಗಿ ಕಾರಂತರಿಗೆ ಬೆಂಬಲ ನೀಡಿದರು. ಮುದ್ದಣ ಕವಿಯ ಗುರುವಾಗಿದ್ದ ಮಳಲಿ ಸುಬ್ಬರಾಯರು ಸಹ ಶಿವರಾಮ ಕಾರಂತರಿಗೆ ಗುರುವಾಗಿದ್ದರು. ಮಳಲಿ ಸುಬ್ಬರಾಯರು ಮೂಲತ: ಯಕ್ಷಗಾನ ರಚನೆ ಮಾಡಬಲ್ಲವರಾಗಿದ್ದು ಯಕ್ಷಗಾನದ ಬಗ್ಗೆ ಶಿವರಾಮರಿಗೆ ಆಸಕ್ತಿ ಮೂಡಲು ಮುಖ್ಯ ಕಾರಣರಾದರು.
ಶಿವರಾಮ ಕಾರಂತರಿಗೆ ಪರಿಸರವೆಂದರೆ ಬಹಳ ಪ್ರೀತಿ. ಅವರು ಬಾಲ್ಯದಲ್ಲಿ ಕೆರೆಗಳನ್ನು ಏರಿ,ಸಮುದ್ರತೀರ,ಮರದ ನೆರಳಿನ ಪ್ರದೇಶಗಳಲ್ಲಿ ಸಮಯವನ್ನು ಕಳೆಯುತ್ತಿದ್ದರು. ಆಧುನಿಕ ವಿದ್ಯಾಭ್ಯಾಸ ಕೇವಲ ಹೊಟ್ಟೆಪಾಡಿಗಾಗಿ ಎನ್ನುವುದು ಅವರ ಅಭಿಪ್ರಾಯ. ನಿಜವಾದ ವ್ಯಕ್ತಿತ್ವದ ವಿಕಸನವಾದರೆ ಅದೇ ನಿಜವಾದ ಶಿಕ್ಷಣವೆನ್ನುವುದು ಅವರ ಅಭಿಪ್ರಾಯವಾಗಿತ್ತು.
1920 ರಲ್ಲಿ ಗಾಂಧೀಜಿಯವರು ಸ್ವತಂತ್ರ ಹೋರಾಟದಲ್ಲಿ ಶಾಲಾ ಮಕ್ಕಳು ಬಾಗವಹಿಸಬೇಕೆಂದು ಕರೆಕೊಟ್ಟಾಗ ಕಾರಂತರೂ ಚಳವಳಿಯಲ್ಲಿ ಭಾಗವಹಿಸಿದ್ದರು.ಕಾರಂತರು ಅಪ್ಪ ಹಾಕಿದ ಆಲದ ಮರಕ್ಕೆ ಎಂದೂ ಜೋತು ಬಿದ್ದವರಲ್ಲ. ಅವರ ಇಡೀ ಬದುಕು ಹಲವಾರು ಪ್ರಯೋಗಗಳಿಂದ ಕೂಡಿದೆ. ಅನುಭವ ಬೆಳೆದಂತೆಲ್ಲ ಅವರು ಹಲವು ಬಾರಿ ತಮ್ಮ ಹಿಂದಿನ ನಿಲುವುಗಳನ್ನು ಬದಲಾಯಿಸಿಕೊಂಡಿದ್ದಾರೆ.
ಪುತ್ತೂರಿನಲ್ಲಿ ಕಾರಂತರ ಹೆಜ್ಜೆಗಳು
ಕಾರಂತರು ಯುವಕರಾಗಿದ್ದಾಗ ಹಲವು ಸಮಾಜ ಸುಧಾರಣೆಗೂ ಕೈ ಹಾಕಿ, ವೇಶ್ಯಾ ವಿವಾಹಗಳನ್ನು ಮಾಡಿಸಿದರಲ್ಲದೆ, ತನ್ನದೇ ಯಕ್ಷಗಾನ ತಂಡಗಳನ್ನು ಕಟ್ಟಿಕೊಂಡು ದೇಶ ವಿದೇಶಗಳಲ್ಲಿ ಈ ಕಲೆಯನ್ನು ಪ್ರಚುರಪಡಿಸಲು ಯತ್ನಿಸಿದರು. ವಿಶೇಷ ಎಂದರೆ ಮಕ್ಕಳಲ್ಲಿದ್ದ ಪ್ರತಿಭೆಯನ್ನು ಗುರುತಿಸಿಲು ಮತ್ತು ಸೂಕ್ತ ತರಬೇತಿ ನೀಡಲು ಕೋಟದಿಂದ ಬಲು ದೂರದ ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರಿನಲ್ಲಿ ”ಬಾಲವನ” ಎಂಬ ಅಸಂಪ್ರದಾಯಿಕ ಶೈಕ್ಷಣಿಕ ಕೇಂದ್ರವನ್ನು ತೆರೆದಿದ್ದರು. ನಂತರ ಪುತ್ತೂರಿನಲ್ಲಿ ಒಂದು ಮುದ್ರಣಾಲಯವನ್ನು ತೆರೆದು, ತಮ್ಮ ಪುಸ್ತಕಗಳನ್ನು ಮುದ್ರಿಸುತ್ತಿದ್ದರಲ್ಲದೆ, ತಮ್ಮ ಹಲವು ಕಾದಂಬರಿಗಳಿಗೆ ತಾವೇ ಮುಖಪುಟದ ಚಿತ್ರಗಳನ್ನೂ ಬರೆದು ಮುದ್ರಿಸಿದ ಬಹುಮುಖ ಪ್ರತಿಭೆ ಇವರದ್ದು. ಬಹುಶಃ ಮುಖಪುಟ ಚಿತ್ರ ಬರೆದು ಪ್ರಕಟಿಸಿದ ಕನ್ನಡದ ಪ್ರಥಮ ಪ್ರಮುಖ ಸಾಹಿತಿ ಇವರೊಬ್ಬರೇ. ಇಂತಹ ಬಹುಮುಖ ಪ್ರತಿಭೆಯ ಸಾಗರ ನಮ್ಮ ಪುತ್ತೂರಿನಲ್ಲಿ ನೆಲೆಸಿದ್ದು ಪುತ್ತೂರಿನ ಸಾಹಿತ್ಯ ಜ್ಯೋತಿಗೆ ಸಿಕ್ಕ ಪ್ರಜ್ವಲಿಪ ಬೆಳಕು ಎಂದರೆ ತಪ್ಪಾಗಲಾರದು.
ಸಿನಿಮಾ ಕ್ಷೇತ್ರದಲ್ಲಿ ಕಾರಂತರು
ಆಡು ಮುಟ್ಟದ ಸೊಪ್ಪಿಲ್ಲ ಅನ್ನುವ ಹಾಗೆ ಕಾರಂತರು ಪ್ರಯೋಗ ಮಾಡದ ಕಲೆಗಳಿಲ್ಲ. ಹೌದು ನಿರಂತರ ಪ್ರಯೋಗಶೀಲರಾಗಿದ್ದ ಕೋಟ ಶಿವರಾಮ ಕಾರಂತರು ಮೂಕಿ ಚಿತ್ರ ನಿರ್ಮಾಣ ಮಾಡುವ ಮೂಲಕ ಕನ್ನಡ ಚಿತ್ರರಂಗದಲ್ಲಿ ಸಹ ತಮ್ಮ ಪ್ರಯೋಗವನ್ನು ಆರಂಭ ಮಾಡಿದ್ದರು. ನಂತರ ಹರಿಜನರ ಬದುಕನ್ನು ಆಧರಿಸಿದ್ದ ಡೊಮಿಂಗೋ (1930) ಚಲನಚಿತ್ರವನ್ನು ತಾವೇ ಚಿತ್ರೀಕರಿಸಿ, ಅಭಿನಯಿಸಿ ಜೊತೆಗೆ ನಿರ್ದೇಶನವನ್ನೂ ಮಾಡಿದ್ದರು. ಅನಂತರ ಭೂತರಾಜ್ಯ (1931) ಎಂಬ ಮೂಕಿ ಚಿತ್ರಗಳನ್ನು ಸಹ ನಿರ್ಮಿಸಿದರು.
ಕಾರಂತರ ಪುಸ್ತಕದ ಹಾದಿ
ಕಾರಂತರ ‘ಮರಳಿ ಮಣ್ಣಿಗೆ,’ ‘ಮೂಕಜ್ಜಿಯ ಕನಸುಗಳು’, ‘ಸರಸಮ್ಮನ ಸಮಾಧಿ, ಜೋಮನದುಡಿ ಹೀಗೆ ಹಲವಾರು ಪುಸ್ತಕಗಳು ಇಂಗ್ಲಿಷಿಗೆ ಅನುವಾದವಾಗಿವೆ. ‘ಹುಚ್ಚುಮನಸ್ಸಿನ ಹತ್ತು ಮುಖಗಳು,’ ಮತ್ತು ‘ಸ್ಮೃತಿ ಪಟಲದಿಂದ ಭಾಗ 1, 2 ಮತ್ತು 3 ಕಾರಂತರ ಆತ್ಮಚರಿತ್ರೆ, ಕಾರಂತರ ಪ್ರವಾಸಕಥನಗಳು “ಅಬೂವಿನಿಂದ ಬರಮಾ’ಕ್ಕೆ ‘ಅಪೂರ್ವ ಪಶ್ಚಿಮ’, ‘ಪೂರ್ವದಿಂದ ಆತ್ಮಪೂರ್ವಕ್ಕೆ, ಮುಂತಾದ ಕೃತಿಗಳು ಕನ್ನಡ ಗದ್ಯದ ಮುಖ್ಯ ಆಕರ್ಷಣೆಗಳು, ಕಾರಂತರ ಸೃಜನಶೀಲ ಕೃತಿಗಳೇ ಸುಮಾರು ನೂರಕ್ಕೂ ಮಿಕ್ಕಿವೆ. ‘ವಸಂತ’, ‘ವಿಚಾರವಾಣಿ’, ಮಕ್ಕಳಿಗೆ ಕನ್ನಡ ಪಠ್ಯಪುಸ್ತಕ’, ‘ಕರ್ನಾಟಕದಲ್ಲಿ ಚಿತ್ರಕಲೆ, ಭಾರತೀಯ ಶಿಲ್ಪ,’ ‘ಕಲೆಯ ದರ್ಶನ’ ಹಾಗೂ ಅವರ ಕಾದಂಬರಿಗಳು ಕಾರಂತರ ಅಪೂರ್ವ ಸಾಧನೆಗೆ ಸಾಕ್ಷಿಗಳಾಗಿವೆ.
ಕಾರಂತರ ನಿರಂತರ ಸೇವೆಗೆ ಹಲವು ಬಹುಮಾನ, ಪ್ರಶಸ್ತಿಗಳು ಬಂದಿವೆ.1963ರಲ್ಲಿ ಕರ್ನಾಟಕ, ಮೈಸೂರು ವಿ.ವಿ.ಗಳು ಗೌರವ ಡಾಕ್ಟರೇಟ್ ನೀಡಿ ಗೌರವಿಸಿದೆ. ಕೇಂದ್ರ ಸರ್ಕಾರ ‘ಪದ್ಮ ಭೂಷಣ’ ಪ್ರಶಸ್ತಿ ನೀಡಿದೆ. ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, 1956ರಲ್ಲಿ ‘ಮೈಸೂರಿನಲ್ಲಿ ನಡೆದ 37ನೇ ಕನ್ನಡ ಸಾಹಿತ್ಯ ಸಮ್ಮೇಳನ ಅಧ್ಯಕ್ಷತೆ, 1977ರಲ್ಲಿ ‘ಮೂಕಜ್ಜಿಯ ಕನಸುಗಳು’ ಕಾದಂಬರಿಗೆ ಜ್ಞಾನಪೀಠ ಪ್ರಶಸ್ತಿ, 1990ರಲ್ಲಿ ಅವರ ‘ಮೈಮನಗಳ ಸುಳಿಯಲ್ಲಿ’ ಕಾದಂಬರಿಗೆ ‘ಪಂಪ ಪ್ರಶಸ್ತಿ’ ಇತ್ಯಾದಿ ಹಲವಾರು ಪ್ರತಿಷ್ಠಿತ ಪ್ರಶಸ್ತಿ, ಪುರಸ್ಕಾರಗಳು ಸಂದಿವೆ. 1973ರಲ್ಲಿ ಮೈ.ವಿ.ವಿ. ಇಂಗ್ಲೀಷಿನಲ್ಲಿ ಇವರ ಜೀವನ ಚರಿತ್ರೆಯನ್ನು ಪ್ರಕಟಿಸಿದೆ. ಕಾರಂತರು 1997 ಡಿಸೆಂಬರ್ 9ರಂದು ನಮ್ಮನ್ನಗಲಿದರು.
ಸಾಹಿತ್ಯ, ರಂಗಭೂಮಿ, ಚಲನಚಿತ್ರ, ವಿಜ್ಞಾನ, ಚಿತ್ರಕಲೆ, ಸಂಗೀತ, ಶಿಕ್ಷಣ, ರಾಜಕೀಯ, ಪತ್ರಿಕೋದ್ಯಮ, ಭಾಷೆ, ಸಂಸ್ಕøತಿ ಹೀಗೆ ಪಟ್ಟಿ ಬೆಳೆಯುತ್ತದೆ. ಕಾರಂತರು ‘ ಬಾಲ ಪ್ರಪಂಚ’, ‘ವಿಜ್ಞಾನ ಪ್ರಪಂಚ’ಗಳನ್ನು ಬರೆದಿದ್ದಾರೆ. ಸಿರಿಗನ್ನಡ ಅರ್ಥಕೋಶವನ್ನು ತಯಾರಿಸಿದ್ದಾರೆ. ಯಕ್ಷಗಾನ ಕುರಿತ ಪುಸ್ತಕಗಳನ್ನು ಬರೆದಿದ್ದಾರೆ. ಸ್ವತಃ ಹಲವು ಪ್ರಯೋಗಗಳನ್ನು ಮಾಡಿದ್ದಾರೆ. ಶಿಲ್ಪಕಲೆ, ಚಿತ್ರಕಲೆ ಕುರಿತ ಪುಸ್ತಕಗಳನ್ನು ಬರೆದಿದ್ದಾರೆ, ಸ್ವತಃ ಚಿತ್ರಗಳನ್ನು ಬರೆದಿದ್ದಾರೆ. ಚಲನಚಿತ್ರ ನಿರ್ಮಿಸಿದ್ದಾರೆ. ಐವತ್ತಕ್ಕೂ ಹೆಚ್ಚು ನಾಟಕಗಳನ್ನು ಬರೆದಿದ್ದಾರೆ.
ಕವನ ಸಂಕಲನಗಳು
- ರಾಷ್ಟ್ರಗೀತ ಸುಧಾಕರ
- ಸೀಳ್ಗವನಗಳು
ಕಾದಂಬರಿಗಳು
- ಅದೇ ಊರು, ಅದೆ ಮರ
- ಅಳಿದ ಮೇಲೆ
- ಅಂಟಿದ ಅಪರಂಜಿ
- ಆಳ, ನಿರಾಳ
- ಇದ್ದರೂ ಚಿಂತೆ
- ಇನ್ನೊಂದೇ ದಾರಿ
- ಇಳೆಯೆಂಬ
- ಉಕ್ಕಿದ ನೊರೆ
- ಒಡಹುಟ್ಟಿದವರು
- ಒಂಟಿ ದನಿ
- ಔದಾರ್ಯದ ಉರುಳಲ್ಲಿ
- ಕಣ್ಣಿದ್ದೂ ಕಾಣರು
- ಕನ್ನಡಿಯಲ್ಲಿ ಕಂಡಾತ
- ಕನ್ಯಾಬಲಿ
- ಕರುಳಿನ ಕರೆ
- ಕೇವಲ ಮನುಷ್ಯರು
- ಗೆದ್ದ ದೊಡ್ಡಸ್ತಿಕೆ
- ಗೊಂಡಾರಣ್ಯ
- ಜಗದೋದ್ಧಾರ ನಾ
- ಜಾರುವ ದಾರಿಯಲ್ಲಿ
- ದೇವದೂತರು
- ಧರ್ಮರಾಯನ ಸಂಸಾರ
- ನಷ್ಟ ದಿಗ್ಗಜಗಳು
- ನಂಬಿದವರ ನಾಕ, ನರಕ
- ನಾವು ಕಟ್ಟಿದ ಸ್ವರ್ಗ
- ನಿರ್ಭಾಗ್ಯ ಜನ್ಮ
- ಬತ್ತದ ತೊರೆ
- ಭೂತ
- ಮರಳಿ ಮಣ್ಣಿಗೆ
- ಮುಗಿದ ಯುದ್ಧ
- ಮೂಜನ್ಮ
- ಮೈ ಮನಗಳ ಸುಳಿಯಲ್ಲಿ
- ಮೊಗ ಪಡೆದ ಮನ
- ವಿಚಿತ್ರ ಕೂಟ
- ಶನೀಶ್ವರನ ನೆರಳಿನಲ್ಲಿ
- ಸನ್ಯಾಸಿಯ ಬದುಕು
- ಸಮೀಕ್ಷೆ
- ಸರಸಮ್ಮನ ಸಮಾಧಿ
- ಸ್ವಪ್ನದ ಹೊಳೆ
- ಹೆತ್ತಳಾ ತಾಯಿ
ಚಲನಚಿತ್ರವಾಗಿರುವ ಕಾದಂಬರಿಗಳು
- ಕುಡಿಯರ ಕೂಸು
- ಚಿಗುರಿದ ಕನಸು
- ಚೋಮನ ದುಡಿ
- ಬೆಟ್ಟದ ಜೀವ
- ಮೂಕಜ್ಜಿಯ ಕನಸುಗಳು – ಜ್ಞಾನಪೀಠ ಪ್ರಶಸ್ತಿ ಲಭಿಸಿದ ಕಾದಂಬರಿ
ಸಣ್ಣ ಕತೆಗಳು
- ಕವಿಕರ್ಮ
- ತೆರೆಯ ಮರೆಯಲ್ಲಿ
- ಹಸಿವು
- ಹಾವು
ಹರಟೆ/ವಿಡಂಬನೆ
- ಗ್ನಾನ
- ಚಿಕ್ಕ ದೊಡ್ಡವರು
- ದೇಹಜ್ಯೋತಿಗಳು ಮತ್ತು ಪ್ರಾಣಿ ಪ್ರಬಂಧಗಳು
- ಮೈಗಳ್ಳನ ದಿನಚರಿಯಿಂದ
- ಮೈಲಿಕಲ್ಲಿನೊಡನೆ ಮಾತುಕತೆಗಳು
- ಹಳ್ಳಿಯ ಹತ್ತು ಸಮಸ್ತರು
ಪ್ರವಾಸ ಕಥನ
- ಅಪೂರ್ವ ಪಶ್ಚಿಮ
- ಅರಸಿಕರಲ್ಲ
- ಅಬೂವಿನಿಂದ ಬರಾಮಕ್ಕೆ
- ಪಾತಾಳಕ್ಕೆ ಪಯಣ
- ಪೂರ್ವದಿಂದ ಅತ್ಯಪೂರ್ವಕ್ಕೆ
- ಯಕ್ಷರಂಗಕ್ಕಾಗಿ ಪ್ರವಾಸ
ನಾಟಕಗಳು
- ಅವಳಿ ನಾಟಕಗಳು
- ಏಕಾಂಕ ನಾಟಕಗಳು
- ಐದು ನಾಟಕಗಳು
- ಕಟ್ಟೆ ಪುರಾಣ
- ಕಠಾರಿ ಭೈರವ
- ಕರ್ಣಾರ್ಜುನ
- ಕೀಚಕ ಸೈರಂಧ್ರಿ
- ಗರ್ಭಗುಡಿ
ಗೀತ ನಾಟಕಗಳು
- ಜಂಬದ ಜಾನಕಿ
- ಜ್ಯೂಲಿಯಸ್ ಸೀಸರ್
- ಡುಮಿಂಗೊ
- ದೃಷ್ಟಿ ಸಂಗಮ
ನವೀನ ನಾಟಕಗಳು
- ನಾರದ ಗರ್ವಭಂಗ
- ಬಿತ್ತಿದ ಬೆಳೆ
- ಬೆವರಿಗೆ ಜಯವಾಗಲಿ
- ಬೌದ್ಧ ಯಾತ್ರಾ
- ಮಂಗಳಾರತಿ
- ಮುಕ್ತದ್ವಾರ
- ಯಾರೊ ಅಂದರು
- ವಿಜಯ
- ವಿಜಯ ದಶಮಿ
- ಸರಳ ವಿರಳ ನಾಟಕಗಳು
- ಸಾವಿರ ಮಿಲಿಯ
- ಹಣೆ ಬರಹ
- ಹಿರಿಯಕ್ಕನ ಚಾಳಿ
- ಹೇಗಾದರೇನು?
- ಹೇಮಂತ
ಆತ್ಮಕಥನ
- ಸ್ಮೃತಿಪಟಲದಿಂದ
- ಹುಚ್ಚು ಮನಸ್ಸಿನ ಹತ್ತು ಮುಖಗಳು
ಜೀವನ ಚರಿತ್ರೆ
- ಕಲಾವಿದ ಕೃಷ್ಣ ಹೆಬ್ಬಾರರು
ಕಲಾಪ್ರಬಂಧ
- ಕಲೆಯ ದರ್ಶನ
- ಕರ್ನಾಟಕದಲ್ಲಿ ಚಿತ್ರಕಲೆ
- ಚಾಲುಕ್ಯ ವಾಸ್ತು ಮತ್ತು ಶಿಲ್ಪ
- ಚಿತ್ರಶಿಲ್ಪ, ವಾಸ್ತುಕಲೆಗಳು
- ಜಾನಪದ ಗೀತೆಗಳು
- ಭಾರತೀಯ ಚಿತ್ರಕಲೆ
- ಭಾರತೀಯ ಶಿಲ್ಪ
- ಯಕ್ಷಗಾನ ಬಯಲಾಟ
- ಸೌಂದರ್ಯ ಪ್ರಜ್ಞೆಯನ್ನು ಬೆಳೆಯಿಸಲು
- ವೈಜ್ಞಾನಿಕ
- ಅದ್ಭುತ ಜಗತ್ತು (1. ವಿಚಿತ್ರ ಖಗೋಲ, 2. ನಮ್ಮ ಭೂಖಂಡಗಳು)
- ಉಷ್ಣವಲಯದ ಆಗ್ನೇಸ್ಯ
- ಪ್ರಾಣಿ ಪ್ರಪಂಚದ ವಿಸ್ಮಯಗಳು
- ಮಂಗನ ಕಾಯಿಲೆ
- ವಿಜ್ಞಾನ ಮತ್ತು ಅಂಧಶೃದ್ಧೆ
- ವಿಶಾಲ ಸಾಗರಗಳು
- ಹಿರಿಯ ಕಿರಿಯ ಹಕ್ಕಿಗಳು
ಮಕ್ಕಳ ಪುಸ್ತಕಗಳು
ಅನಾದಿ ಕಾಲದ ಮನುಷ್ಯ
ಒಂದೇ ರಾತ್ರಿ ಒಂದೇ ಹಗಲು
ಗಜರಾಜ
ಗೆದ್ದವರ ಸತ್ಯ
ಢಂ ಢಂ ಢೋಲು
ನರನೋ ವಾನರನೋ
ಮರಿಯಪ್ಪನ ಸಾಹಸಗಳು
ಮಂಗನ ಮದುವೆ
ಸೂರ್ಯ ಚಂದ್ರ
ಹುಲಿರಾಯ
ಕನ್ನಡ ನಾಡು ಮತ್ತು ಕನ್ನಡಿಗರ ಪರಂಪರೆಗೆ ಸಂಬಂಧಿಸಿದ 10 ಪುಸ್ತಕಗಳು
ಐಬಿಎಚ್, ಮೂಲವಿಜ್ಞಾನ ಪಾಠಮಾಲೆ ಹಾಗು ‘ಇಕೊ’ ದವರಿಗಾಗಿ ಮಾಡಿದ ಅನುವಾದಗಳು : ಸುಮಾರು 133
‘ಇಕೊ’ ದವರಿಗಾಗಿ ಮಾಡಿದ ಸಂಪಾದಿತ ಪುಸ್ತಕಗಳು : 42
ಶೈಕ್ಷಣಿಕ ಕೃತಿಗಳು
ಮಕ್ಕಳ ಶಿಕ್ಷಣ
ಓದುವ ಆಟ
ಗೃಹ ವಿಜ್ಞಾನ
ಚಿತ್ರಮಯ ದಕ್ಷಿಣ ಕನ್ನಡ
ಚಿತ್ರಮಯ ದಕ್ಷಿಣ ಕನ್ನಡ – ಅಂದು, ಇಂದು
ಚಿತ್ರಮಯ ದಕ್ಷಿಣ ಹಿಂದುಸ್ತಾನ
ನಾಗರಿಕತೆಯ ಹೊಸ್ತಿಲಲ್ಲಿ
ರಮಣ ತಾತ
ಸ್ನೀತಿ
ಸಾಮಾನ್ಯ ವಿಜ್ಞಾನ
ಸಿರಿಗನ್ನಡ ಪಾಠಮಾಲೆ
ಹೂಗನ್ನಡ ಪಾಠಮಾಲೆ
ಇತರ ಲೇಖನ
ಪ್ರಜಾಪ್ರಭುತ್ವವನ್ನು ಕುರಿತು
ಬಾಳ್ವೆಯೇ ಬೆಳಕು
ಬಾಳ್ವೆಯೇ ಬೆಳಕು ಅಥವಾ ಜೀವನ ಧರ್ಮ
ಮನೋದೇಹಿಯಾದ ಮಾನವ
ವಿಚಾರಶೀಲತೆ
ವಿಚಾರ ಸಾಹಿತ್ಯ ನಿರ್ಮಾಣ
ಸ್ವಾರ್ಥಿ ಮಾನವ
ಸಂಪಾದನೆ
ಐರೋಡಿ ಶಿವರಾಮಯ್ಯ ಬದುಕು, ಬರಹ
ಕೌಶಿಕ ರಾಮಾಯಣ
ಪಂಜೆಯವರ ನೆನಪಿಗಾಗಿ
ವಿಶ್ವಕೋಶ
ಕಲಾ ಪ್ರಪಂಚ
ಪ್ರಾಣಿ ಪ್ರಪಂಚ
ಬಾಲ ಪ್ರಪಂಚ
ವಿಜ್ಞಾನ ಪ್ರಪಂಚ
ನಿಘಂಟು
ಸಿರಿಗನ್ನಡ ಅರ್ಥಕೋಶ
ಅನುವಾದ
ಕೀಟನಾಶಕಗಳ ಪಿಡುಗುಗಳು
ಕೋಟ ಮಹಾಜಗತ್ತು
ಜನತೆಯೂ ಅರಣ್ಯಗಳೂ
ನಮ್ಮ ಪರಮಾಣು ಚೈತನ್ಯ—ಉತ್ಪಾದನಾ ಸಾಧನಗಳು
ನಮ್ಮ ಶಿಕ್ಷಣ ಪದ್ಧತಿಯ ಸಮಸ್ಯೆಗಳೂ, ಭವಿಷ್ಯವೂ
ನಮ್ಮ ಸುತ್ತಲಿನ ಕಡಲು
ನಮ್ಮೆಲ್ಲರಿಗೂ ಒಂದೇ ಭವಿಷ್ಯ
ಪರಮಾಣು – ಇಂದು ನಾಳೆ
ಪಂಚ ಋತು
ಬೆಳೆಯುತ್ತಿರುವ ಸಮಸ್ಯೆ
ಭಾರತದ ಪರಿಸರ – ದ್ವಿತೀಯ ಸಮಿಕ್ಷೆ
ಭಾರತದ ಪರಿಸರದ ಪರಿಸ್ಥಿತಿ – 1982– ಪ್ರಜೆಯ ದೃಷ್ಟಿಯಲ್ಲಿ
ಭಾರತ ವರ್ಷದಲ್ಲಿ ಬ್ರಿಟಿಷರು
ಯಾರು ಲಕ್ಷಿಸುವರು?
ಶ್ರೀ ರಾಮಕೃಷ್ಣರ ಜೀವನ ಚರಿತೆ